Dekabrın 24-də Azad Fikir Universitetinin qonağı enerji və beynəlxalq münasibətlər üzrə mütəxəssis Bəxtiyar Aslanbəyli idi. O, Cənubi Qafqazda geosiyasi və enerji məsələləri haqqında tələbələrə mühazirə oxudu.
Bəxtiyar Aslanbəyli Xəzər hövzəsinin və Orta Asiyanın neft və qaz ehtiyatları haqqında qısa giriş verdikdən sonra bu ehtiyatların dünya bazarına çıxarılması problemlərindən söz açdı.
Regionda artıq mövcud olan, eləcə də planlaşdırılan və çəkilməkdə olan ixrac boru kəmərləri barədə tələbələri maraqlı məlumatlarla tanış edən Aslanbəyli həm də bu kəmərlər ətrafında dolaşan siyasi və geosiyasi məsələlər haqqında da danışdı.
